کتنے مزے کی بات ہے کہ 75 سالہ سکاٹش دادی امّاں فورٹ نائیٹ کی شاندار پلئیر ہیں۔ کاش ہماری دادو بھی گیم کھیلتی ہوتیں تو اُن کے ساتھ میچ کھیلنے کا کتنا مزہ آتا لیکن ہماری ایسی قسمت کہاں؟ خیر اُن خوش نصیب دادی پوتے کی کہانی پوری سن لیں۔ ہوا یوں کہ آج سے کوئی سات سال پہلے ایک عظیم دادی کا پوتا پی ایس فور پر ہر طرح کی آن لائن گیمز کھیلتا تھا اور دادی امّاں کے ساتھ وقت گزارنے کے لئے انہیں یہ گیمز سکھاتا بھی تھا لیکن دادی امّاں کو سب گیمز بورنگ لگتی تھیں، پھر2017 میں آئی فورٹ نائیٹ گیم۔ جسے دیکھتے ہی دادی امّاں کی دلچسپی اتنی بڑھی کہ انہوں نے فوراً کھیلنے کا فیصلہ کر لیا۔ اُنہوں نے کھیلنا شروع کی اور ساتھ لائیو سٹریمنگ بھی کی، آج یو ٹیوب پر دادی امّاں کے 5ہزار 9 سو اور ٹویچ پر 21 ہزار 5 سو فالوورز ہیں۔ آئیے جانیں کہ فورٹ نائیٹ کو کیا چیز دیگر گیمز سے منفرد بناتی ہے۔

مفت، مفت اور ہے کافی مفت

گیم کا سب سے مشہور طریقہ بیٹل روئیل ہے جس میں  100 پلیئرز کا اکیلے یا دو اور چار کی ٹیم بنا کر مخالف سے مقابلہ کرنا ہے۔ جب 2017 میں فورٹ نائیٹ مارکیٹ میں آئی تو بیٹل روئیل سے مختلف تھی یہ’سیو دی ورلڈ‘ موڈ تھا جسے 20 ڈالرز  کی قیمت ادا کر کے کھیلا جاتا تھا لیکن کچھ ماہ بعد ہی بیٹل روئیل موڈ متعارف کروایا گیا اور یہ بالکل مفت تھا۔ بس یہیں سے گیم کی کامیابی کا سفر شروع ہو گیا جو ابھی تک جاری و ساری ہے۔ ہاں پلیئرز مخصوص گیم موڈز اور مختلف آئٹمز کے لئے قیمت ادا کرتے ہیں۔

کھیلئےکبھی بھی ، کہیں سے بھی

فورٹ نائیٹ گیمنگ کی دنیا میں انقلاب لانے والی گیم کے طور پر مشہور ہے۔ اِس گیم نے لاکھوں، کروڑوں لوگوں کو آن لائن گیمز کی طرف متوجہ کیا ہے، آخر اس کی وجہ کیا ہے؟ اس کی وجہ اس کا ہر ایک کے لئے قابلِ رسائی ہونا ہے۔ فورٹ نائیٹ سے لطف اندوز ہونے کے لئے آپ کو اعلیٰ معیار کا کمپیوٹر یا مخصوص پلے اسٹیشن خریدنے کی کوئی خاص ضرورت نہیں بلکہ آپ اپنے موبائیل سے بڑے آرام سے یہ گیم کھیل سکتے ہیں، دوستوں کو شامل کر سکتے ہیں اور جیت کا مزہ لے سکتے ہیں۔ یہی اس گیم کی ‘فرش توڑ‘ کامیابی کا راز ہے۔

تشدد کا اظہار دیگر گیمز کے مقابلے میں کم ہے

آپ جو بھی شوٹنگ گیم کھیلتے ہیں اُس میں تشدد اور مار پیٹ کا واضح اظہار ہوتا ہے، خون بھی بہتا ہوا نظر آتا ہے لیکن فورٹ نائیٹ میں خون بہتا ہوا نظر نہیں آتا، بس دشمن غائب ہو جاتا ہے اور کارٹون نما ہونے کی وجہ سے کم متشدد معلوم ہوتی ہے مگر پھر بھی اِسے 13 سال سے کم عمر بچوں کے لئے نامناسب قرار دیا گیا ہے اس لئے کہ بہرحال دوسروں کو مار کر ہی جیت کا سفر مکمل کرنا ہے۔

پلیئرز کا قلعے اور دفاعی عمارتیں تعمیر کرنا

جب ٹیم کی صورت میں کھیلتے ہیں تو دفاعی قلعے بنانا لازمی ہوتا ہے اگر آخر تک زندہ رہنا چاہتے ہیں تو گیم کا سارا ماحول قابلِ تسخیر ہے۔ ایک کلہاڑے کی مدد سے کہیں سے بھی اور کچھ بھی توڑا جا سکتا ہے اور لکڑی، لوہا، اینٹ حاصل کر کے دیواریں، فرش، چھت اور سیڑھیاں بنائی جا سکتی ہیں۔ اپنے نقشے کو مدِ نظر رکھتے ہوئے دفاعی عمارت بنانا کافی فائدہ مند ثابت ہوتا ہے جیسے کہ اونچی جگہ پر دفاع قائم کرنے سے دشمن پر نظر رکھنا آسان ہو جاتا ہے، آگ لگنے کی صورت میں اپنا بچاؤ کیا جا سکتا ہے اور ناقابلِ رسائی اشیاء تک پہنچنا بھی ہو جاتا ہے آسان۔

گیم کا مسلسل بہتر ہونا

 فورٹ نائیٹ بیٹل روئیل کے بنانے والے پلئیرز کے رجحانات کو بہت قریب سے دیکھتے ہیں اور اسی حساب سے گیم میں ردو بدل بھی کرتے رہتے ہیں۔ یہ گیم تقریباً ہر ہفتے ‘اپ ڈیٹ‘ ہوتی ہے۔ جس میں گیم کھیلنے کے نئے طریقے، اپنی پسند کے مطابق رنگ اور خصوصیات بدلی جا سکنے والی آئٹمز اور نئے ایونٹس منعقد کئے جاتے ہیں تاکہ کھیلنے والوں کا شوق قائم اور بڑھتا رہے۔

گیم سیکھنا ہو گیا آسان

گیم میں ہیں مشکل اور پیچیدہ نظام، جنہیں سیکھنا نہیں ہے آسان۔ لیکن اس میں مزے کی ایک چیز یہ ہے کہ دورانِ کھیل اگر آپ کی ‘موت‘ واقع ہو جاتی ہے تو گیم آپ کو مارنے والے کے زاویے سے چلنا شروع ہو جاتی ہے اور جب مزید آگے بڑھتی ہے تو خوش قسمتی سے آپ مختلف پلیئرز کے زاویے سے گیم کو دیکھ سکتے ہیں اور کافی ساری تکنیکیں اور جنگ کے حربے سیکھ سکتے ہیں، اسی طرح ماہر کھلاڑیوں کو کھیلتا دیکھ کر خود بھی ماہر بن سکتے ہیں۔

ساری بات ہے اسٹائل کی

آپ اپنے کھیل کے تجربے کو دلچسپ اور مزیدار کیسے بنا سکتے ہیں؟ اِس کے لئے آپ کو گیم کی کرنسی ‘وی بکس‘ سے مختلف کردار یا آؤٹ فٹس خریدنا ہوں گے۔ جی ہاں! انٹر ٹینمنٹ کی دنیا کے کرداروں سا بھیس بدل کر کھیل کے مزے کو دوبالا کیا جا سکتاہے۔

مسلسل بدلتا منظر نامہ

گیم کو تروتازہ رکھنے کے لئے اس کے منظر نامے کو مسلسل تبدیل اور دلچسپ بنایا جاتا ہے اور یہ تبدیلی ہر نئے سیزن میں کی جاتی ہے۔اس کے علاوہ محدود وقت کے ‘موڈز‘ بھی متعارف کروائے گئے ہیں جن میں کھلاڑی منفرد تجربے سے گزرتے ہیں اور جزیرے کی نئے سرے سے سیر کرتے ہیں۔

گیم مفت لیکن کمائی کروڑوں کی، کیسے؟

گیم کا روئیل بیٹل موڈ مفت ہے لیکن ‘سیو دی ورلڈ’ موڈ کھیلنے کے لئے قیمت ادا کرنی ہوتی ہے اس کے علاوہ بیٹل روئیل میں گیم کے اندر کی کرنسی ‘وی بکس’ چلتی ہے۔ اس کرنسی سے کھلاڑی بیٹل پاس اور پلیئر آؤٹ فٹس خریدتے ہیں۔یہ کرنسی حقیقی رقم سے خریدی جاتی ہے۔1000 وی بکس خریدنے کے لئے 10 یوروز اور دس ہزار بکس خریدنے کے لئے 100 یوروز خرچ کرنے پڑتے ہیں۔

آخری دو بول

گیم کھیلئے، بہت مزے کی ہے، دوستوں کے ساتھ کھیلنے سے دوستی مزید اچھی ہو سکتی ہے، جنگی تکنیک سیکھ کر آپ ذہین بھی بن سکتے ہیں۔لیکن صرف ایک کام ہے جو ہر حال میں اور ہر صورت میں کرنا ہے اور وہ ہے احتیاط سے کھیلنے کا اور اس طرح کھیلنے کا

کہ آپ کی ذہنی اور جسمانی صحت کا نقصان نہ ہو۔ باقی سب ٹھیک ہے۔

کیا گیم فورٹ نائیٹ بیٹل روئیل سے پیسے کمائے جا سکتے ہیں؟ – Esports Planet