دنیا کی 2۔8 ارب کی آبادی میں سے تقریباً 53٪ لڑکے آن لائن گیمز کھیلتے ہیں جو 2 ارب سے زیادہ بنتے ہیں۔ ان گیمز میں سب سے زیادہ مشہور فورٹ نائیٹ، پب جی، مائن کرافٹ، لیگ آف لیجنڈز، فری فائیر اور دیگر کئی شامل ہیں۔ مسلسل بدلتےاشاریے بتاتے ہیں کہ آن لائن گیمز کی دنیا دن بدن ترقی کر رہی ہے۔ روزانہ کے ان گنت گھنٹے گیمز سیکھنے، کھیلنے اور جیتنے پر صرف کیے جاتےہیں اور اب تو اس میں ہر عمر، طبقے اور علاقے کے لوگ شامل ہو رہے ہیں۔ان میں زیادہ تر ترقی یافتہ دنیا کا حصہ ہےجہاں انٹرنیٹ کی رفتار کافی تیز ہے۔ آج ہم خاص طور پر 5اُن گیمز کا ذکر کریں گے جو ساری دنیا میں سب سے زیادہ کھیلی جاتی ہیں اور جنہیں امّی ابا کی ڈانٹ کے باوجود بچے چھوڑ نہیں پاتے۔

Fortnite فورٹ نائیٹ

روزانہ کھیلنے والے پلیئرز: 6 کروڑ

کم از کم مہینے میں ایک دفعہ کھیلنے والے پلیئرز: 11 کروڑ

رجسٹرڈ پلیئرز: 65 کروڑ

یہ کھلاڑی 90٪ لڑکے ہیں اور ان میں بھی 62٪ ،18 سے 24 سال کے درمیان ہیں۔

گیم کی وجہء شہرت

انتہائی مشہور اور پسند کی جانے والی اس گیم میں ایسا کیا ہے جو ساری دنیا کی توجہ کھینچے ہوئے ہے؟ آئیے جانتے ہیں۔

فورٹ نائیٹ 2017 میں جب مارکیٹ میں آئی تو اِس نے دنیا کو ہلا کے رکھ دیا اور آج تک کروڑوں لوگوں کو اپنا دیوانہ بنائے ہوئے ہے۔ سب سے بڑی خوبی یہ ہے کہ گیم مفت ہے اور موبائل، لیپ ٹاپ، پلے اسٹیشن ہر جگہ کھیلی جا سکتی ہے۔ ملٹی پلیئرز یعنی 100 کھلاڑیوں کے مل بیٹھنے سے گیم کا آغاز ہوتا ہے، پیرا شوٹ کے ذریعے طوفان میں گھِرے ایک جزیرے پر پہنچنا ہے، اپنا دفاع کرنے کے لیے کلہاڑے سے اینٹیں، پتھر توڑ کر قلعہ خود بنانا ہے، دشمن کو مارنا بھی ہے اور مرنے سے بچنا بھی ہے۔

گیم کے اندر جو پلیئر ہے اُس کے لئے اپنی پسند کے کئی لباس میسر ہیں، ایک میچ میں آپ سپائڈر مین بن کر چھلانگیں لگا رہے ہیں تو دوسرے میچ میں کیلا بن کر مزاحیہ ناچ ناچ رہے ہیں۔ کھیلنے والا ہر طرح کے تجربے سے لطف اندوز ہو سکتا ہے۔ ہر ہفتے نئی اپ ڈیٹس آ رہی ہیں، مشہور فلموں کے نامی گرامی اسٹارز کے کردار گیم میں ملتے ہیں تو اُن جیسا بننے کا خواب بھی پورا ہو جاتا ہے اور کھیلنے کا مزہ بھی مل جاتا ہے۔ ابھی مئی میں فورٹ نائیٹ کا اسٹار وارز ورژن آیا تھا جس میں بے تحاشا لوگوں کا اسٹار وارز کے کردار بننے کا خواب پورا ہوا اور گیم نے لاتعداد کامیابیاں بھی سمیٹیں۔

PUBG پب جی

روزانہ کھیلنے والے پلیئرز: 2 کروڑ، 50 لاکھ اور چینی ورژن میں 5 کروڑ، کل: 7کروڑ، 50 لاکھ

کم از کم مہینے میں ایک بار کھیلنے والے پلیئرز: چینی ورژن ملا کر: 3 کروڑ

رجسٹرڈ پلیئرز: 20 کروڑ صرف موبائیل گیم میں

وجہء شہرت

یہ گیم بھی 2017 میں مارکیٹ میں آئی۔ 100 سے زیادہ کھلاڑیوں نے ایک جزیرے پر اُتر کر بقاء کی جنگ لڑنی ہے اور سب کا خاتمہ کر کے زندہ بچنا ہے اور ظاہر ہے جو زندہ بچے گا، جیتے گا بھی وہی۔ پب جی اور فورٹ نائیٹ کا منظر نامہ ملتا جلتا ہے، فرق یہ ہے کہ فورٹ نائیٹ کا ماحول کارٹون نما ہے اور پب جی کا ماحول حقیقی ہے۔ پب جی کی بے پناہ مقبولیت کی بہت سی وجوہات ہیں۔

ایک تو یہ ہی کہ  اس کا ماحول حقیقت کے قریب ہے، گرافکس شاندار ہیں، لڑائی اتنی حقیقی ہوتی ہے کہ پلیئر ذہنی اور جذباتی طور پر پورے کا پورا گیم میں گُم ہو جاتا ہے۔

دوسری بڑی وجہ دوست بننا ہے۔ کئی لوگوں کا کہنا ہے کہ گیم کا سب سے خوبصورت لمحہ وہ نہیں ہوتا جب وہ ‘ چکن ڈنر’ کرتے ہیں یعنی گیم جیت جاتے ہیں بلکہ وہ ہوتا ہے جب وہ گیم میں ایک دوسرے کے ساتھ تعاون کر کے دوست بناتے ہیں جو پھر اصل زندگی میں اُن کے پکے ساتھی بن جاتے ہیں اور یہ لمحے یادگار ہوتے ہیں۔

تیسرا نکتہ یہ کہ میپ یعنی نقشے ایسے شاندار اور تفصیلی ہوتے ہیں اور تکنیکی خصوصیات اتنی ہوتی ہیں کہ نہ صرف گیم کھیلنا آسان ہو جاتا ہے بلکہ لُطف بھی دوبالا ہو جاتا ہے۔

چوتھی خوبی اس کا موبائیل فرینڈلی ہونا ہے۔ گیم آئی تو پی سی پر کھیلنے کے لئے تھی لیکن پھر اس کا موبائیل ورژن متعارف کروایا گیا جو کئی ورلڈ ریکارڈ توڑ گیا اور آج بھی انتہائی پسندیدہ ہے۔

پچھلے کچھ عرصے میں گیم کی مقبولیت میں کچھ کمی واقع ہوئی کیونکہ کئی کھلاڑیوں نے انٹر نیٹ دستیابی اور دیگر تکنیکی خرابیوں کا سامنا کرنے کی شکایت کی۔ اس کے علاوہ بعض ملکوں میں اس پر پابندی بھی لگا دی گئی ہے۔ لیکن اب 2025 میں گیم کی مالک کمپنی ‘کرافٹن’ نے کافی اپ ڈیٹس کی ہیں اور خامیوں کو دور کیا ہے جس سے بہت سے پلیئرز واپس لوٹ آئے ہیں اور گیم دوبارہ مشہور ہو رہی ہے۔

Free Fire فری فائیر

روزانہ گیم کھیلنے والے پلیئرز: 10 کروڑ صرف فروری 2024 میں

کم از کم  ایک بار کھیلنے والے یوزرز: 5 کروڑ 40 لاکھ مہینے میں

وجہء شہرت

فورٹ نائیٹ اور پب جی کی طرح فری فائیر بھی روئیل بیٹل شوٹنگ گیم ہے۔ان گیمز کے ساتھ اتنے سخت مقابلے کے باوجود یہ گیم بھی اتنی کامیاب کیسے ہے؟ آئیے آپ بھی جانئے! تو معاملہ یوں ہے جناب کہ یہ گیم خاص طور پر موبائیل استعمال کرنے والوں کے لئے بنائی گئی، مفت کھیلی جاتی ہے اور اس کے میچز مختصر ہوتے ہیں۔ پھر مشہور شخصیات کے تعاون نے بھی لوگوں کی دلچسپی میں اضافہ کیا ہے جیسے ‘کرسٹیانو رونالڈو‘ کے بدولت ‘آپریشن کرونو’ کردار شامل کیا گیا تو گیمرز کی تعداد میں بے تحاشا اضافہ دیکھنے میں آیا، اسی طرح عالمی شہرت یافتہ ‘بی ٹی ایس‘ بینڈ نے 2022 میں فری فائیر کے ساتھ تعاون کیا اور گیم کی شہرت میں چار چاند لگے، اس کے علاوہ جسٹن بائیبر، ڈی جے آلوک اور دیگر فری فائیر کی ترقی میں اہم کردار ادا کر چکے ہیں۔

League of Legends لیگ آف لیجنڈز

روزانہ گیم کھیلنے والے پلیئرز: 3 کروڑ 50 لاکھ

کم از کم مہینے میں ایک بار کھیلنے والے پلیئرز: 5 کروڑ 33 لاکھرجسٹرڈ پلیئرز: 18 کروڑ سے زیادہ

وجہء شہرت

لیگ آف لیجنڈز سال 2009 میں مارکیٹ میں آئی۔ یہ بھی روئیل بیٹل گیم ہے، کمپیوٹرز پر مفت کھیل سکتے ہیں۔ 5،5 کھلاڑیوں کی دو ٹیمز آپس میں مقابلہ کرتی ہیں۔اپنے آپ کو بچاتے ہوئے دشمن کی بیس تک پہنچنا ہے اور اُسے تباہ کرنا ہے۔ گیم میں ‘چیمپئن’ کے کردار کو پلیئر کنٹرول کرتا ہے اور دشمن کو مارتے ہوئے پوائنٹس حاصل کرتا ہے۔ گیم مشہور بھی ہے لیکن متشدد ہونے کی وجہ سے تنقید کا سامنا بھی رہتا ہے۔

گیم کی کمائی عموماً کرداروں کی نت نئی اسکن کی خریداری سے ہوتی ہے۔ 26 سال پرانی ہونے کے باوجود مقبولِ خاص و عام ہے کیونکہ گیمنگ کی زبان میں میچور کونٹینٹ ہے اسی لئے ہنوز راج کر رہی ہے۔ گیم کی پرفارمنس اور کمپنی کی پالیسی کی وجہ سےکئی پلیئرز گیم کھیلنا چھوڑ چکے ہیں لیکن ابھی بھی کروڑوں کھیلنے والوں کے دل کی دھڑکن ہے۔

Minecraft مائن کرافٹ

روزانہ کھیلنے والے پلیئرز: 2025 میں 5 کروڑ  اور عموماً 15 لاکھ

کم از کم مہینے میں ایک بار ایکٹو ہونے والے پلیئرز: 20 کروڑ سے زیادہ

رجسٹرڈ پلیئرز: 30 کروڑ

وجہء شہرت

سادہ سی یہ گیم باقی گیمز کی طرح بالکل بھی روئیل بیٹل نہیں ہے۔ یعنی ٹینشن کے ماحول سے ہٹ کر اِس میں اپنا مقصد خود بنایا جاتا ہے۔ پلیئر آزادی سے دنیا میں گھومتا پھرتا ہے۔ اینٹ پر اینٹ جوڑ کر خود اپنی عمارت تعمیر کرتا ہے۔ دن میں ‘کریپرز’ یعنی پیچھے پڑ جانے والوں سے اور رات میں ‘زومبی’ سے اپنے گھر کو محفوظ رکھتا ہے۔ اس گیم کی دنیا ایسی ہے جہاں آپ اپنے فیصلے خود کرتے ہیں، خود ہی تخلیق کار ہیں، کوئی آپ کو حکم جاری نہیں کرتا، نیا کھیلنے والوں کے لئے گیم میں کوئی دشمن نہیں ہے لیکن گیم کے سروائیول موڈز بھی ہے جہاں لڑائی کرنی ہوتی ہے۔

اِسے موبائیل،  پلے اسٹیشن وغیرہ پر کھیلا جا سکتا ہے۔ مزے کی بات یہ ہے کہ گیم کے زیادہ تر پلیئرز 3 سے 12 سال کی عمر کے بچے ہیں، جن میں 54٪ لڑکے اور 46٪ لڑکیاں ہیں۔ مائن کرافٹ کے 50٪ پلیئرز اکیلے کھیلنا پسند کرتے ہیں اور 11٪ والدین روزانہ اپنے بچوں کے ساتھ کھیلتے ہیں۔ گیم تعلیمی مقصد کے لئے بھی کھیلی جاتی ہے۔ بس پھر تو فائدہ ہے یعنی ایک تیر سے دو شکار۔ کھیل بھی اور علم بھی۔

ذاتی راۓ

گیمز کھیلنا صرف وقت گزارنے کا ایک مشغلہ ہی نہیں بلکہ ایک دنیا ہے، جہاں ہر کھلاڑی کی ایک اپنی پہچان اور اپنی کہانی ہے اور  ہر کسی کی جیت کا اپنا لمحہ ہے۔ میں نے ان گیمز کو کھیلنے سے زیادہ سمجھنے کے لیے دیکھا ہے۔ چاہےفورٹ نائیٹ کی تخلیقی دنیا ہو یا مائن کرافٹ کی خاموش تعمیر، ہر گیم میں کچھ نہ کچھ سیکھنے کو مل ہی جاتا ہے۔ شاید یہ ہی وجہ ہے کہ یہ گیمز لڑکوں کے ہی نہیں، بلکہ ہر عمر کے لوگوں کے دل جیت چکی ہیں۔ اور اگر آپ بھی ایسے ہی کبھی کسی گیم میں کھو جائیں، تو یاد رکھیں — یہ صرف وقت گزاری نہیں، یہ ایک تجربہ ہے۔ آپ کی پسندیدہ گیم کون سی ہے؟ کومنٹس میں ضرور بتائیں!

توجہ فرمائیے: اعداد و شمار میں اب بھی کمی بیشی ہو سکتی ہے اگرچہ یہ ڈیٹا مختلف سائیٹس سے موازنہ کرنے کے بعد شائع کیا گیا ہے۔

اگر اُردو میں گیمز کے بارے میں مزید پڑھنا چاہتے ہیں یہ پڑھئے

کیا ہے فورٹ نائیٹ میں ایسا کہ 75 سالہ دادی امّاں بھی کھیلتی ہیں؟ – Esports Planet

کیا گیم فورٹ نائیٹ بیٹل روئیل سے پیسے کمائے جا سکتے ہیں؟ – Esports Planet

آن لائن گیم فورٹ نائیٹ بیٹل روئیل: جیت کے راز؟ – Esports Planet