فورٹ نائیٹ ایک ایسی گیم ہے جو روزانہ لاکھوں افراد کھیلتے ہیں اور کئی لاکھوں افراد ایسے ہیں جو اِن کھلاڑیوں کو کھیلتا ہوا دیکھ کر سیکھتے ہیں۔ اِن میں سے اکثر تو گیمز کا شوق رکھتے ہیں اور کچھ ایسے بھی ہیں جو باقاعدہ کمائی کر تےہیں۔اس گیم سے پیسے کمانے کے تین طریقے ہیں۔

•       فورٹ نائیٹ کی بانی کمپنی ‘ایپک گیمز‘ کے منعقد کردہ ٹورنامنٹس میں شریک ہو کر اور مقابلے جیت کر آپ امیر ہو سکتے ہیں۔

•       سپورٹ اے کری ایٹر کوڈ بنا کر  ڈالرز حاصل کر سکتے ہیں۔

•       اناڑی کو بنائیں ماہر کھلاڑی

آئیے اِن طریقوں کو تفصیل سے جانتے ہیں۔

گیم کے ٹورنا منٹس میں شرکت کیسے کریں؟

رقم جیتنے کے لئے اگر آپ گیم کے مقابلوں میں حصہ لینا چاہتے ہیں تو آئیے ہم آپ کو اس کا طریقہ سمجھاتے ہیں۔

کرنا کچھ یوں ہے کہ آپ نے گیم کے ‘مین مینو‘ میں ‘کم پِیٹ’ والے حصے میں تشریف لےجانا ہے اور وہ ٹورنامنٹ منتخب کرنا ہے جس میں آپ حصہ لینا چاہتے ہیں۔ پھر اُس تمام معلومات کی تفصیل بتانی ہے جو کمپنی آپ کے بارے میں جاننا چاہتی ہے اور پھر ‘کوالیفائیرز‘ کے بٹن پر کلک کر کے گیم کھیلنا شروع کر دینی ہے۔آپ کو کمپنی کے بتائے گئے وقت پر سائن اِن ہونا ہے اگر مقررہ وقت پر مقابلے میں حصہ نہیں لیا تو آپ ‘ڈس کوالیفائی’ ہو جائیں گے اور اگلے مرحلے میں حصہ نہیں لے سکیں گے۔ بس دھیان رہے یہ ٹورنا منٹ ٹھیک ٹھاک مشکل ہوتے ہیں اور اِن میں جیتنے کے لیے خوب جان مارنی پڑتی ہے۔ کیا ہے آپ میں اتنا دم؟

اگرآپ کا سکور اچھا ہوا تو کمپنی آپ کو ورلڈ کپ میں کھیلنے کے لئے خود دعوت دے گی۔ ورلڈ کپ کے معرکے تک پہنچنے کے لئے اِن ٹورنامنٹس میں حصہ لینا اور کامیاب ہونا بہت ضروری ہے ، ویسے ان ٹورنامنٹس کے پہاڑ سر کرتے کرتے ہی آپ کافی رقم کما لیں گے کیونکہ یہ ٹورنامنٹس بھی انعامی رقم رکھتے ہیں تو سوچ کیا رہے ہیں، لیں حصہ اور سب کے چھکے چھڑوا دیں اور اُڑا لے جائیں جیت کی رقم۔

اس کے علاوہ آپ روزانہ کے ‘کیش کپ‘ میں بھی حصہ لے سکتے ہیں اور لیڈر بورڈ کے درجہ اوّل پر آکر انعام حاصل کر سکتے ہیں، اگرچہ اِن کیش کپس کی رقم تھوڑی ہوتی ہے لیکن اس میں کامیاب ہو کر آپ فورٹ نائیٹ کے ورلڈ کپ کے لئے تیار ہو سکتے ہیں جو آپ کو کروڑ پتی بنا دے گا۔

سپورٹ اے کری ایٹر کوڈ کیا ہے؟

فورٹ نائیٹ روئیل بیٹل گیم سے کمائی کا اگلا طریقہ ہے سپورٹ کری ایٹر کوڈ کے لئے اپلائی کرنا۔ اِس کے لئے آپ کمپنی ‘ایپک گیمز’ کے پیج پر اپنے سوشل میڈیا چینلز کی معلومات فراہم کریں گے۔ کمپنی آپ کے تمام چینلز کی تصدیق کرے گی اور یقینی بنائے گی کہ آپ ‘کوڈ’ کے اہل ہیں یا نہیں۔ ہو گا کچھ یوں کہ جب بھی کوئی گیم میں موجود پلے اسٹور سے کوئی آئٹم خریدنے کے لئے آپ کا کوڈ استعمال کرے گا تو اِس خریداری کی رقم کا ایک حصہ کمپنی آپ کو ادا کرے گی۔ اس سہولت سے فائدہ اٹھانے کے لئے ضروری ہے کہ آپ زیادہ سے زیادہ اپنا کوڈ لوگوں تک پہنچائیں اور گیم کی تشہیر کریں،اس کے لئے ویڈیوز بنائیں، بلاگز لکھیں یا گیم جیتنے کے طریقے بتائیں۔ اس طرح جب آپ کا کوڈ جتنی خریداریوں میں استعمال ہو گا، اُتنا آپ پیسے کما سکیں گے۔

آن لائن گیم کھیل کر لوگوں کو متوجہ کریں اور اناڑی کو بنائیں ماہر کھلاڑی

تیسرا طریقہ ہے یہ کہ اگر آپ کو اپنی گیمز کھیلنے کی صلاحیتوں پر اعتماد ہے اور آپ سمجھتے ہیں کہ آپ اوروں کو بھی سکھا سکتے ہیں اور سونے پر سہاگہ آپ کے کامیاب سوشل میڈیا چینلز بھی ہیں تو آن لائن گیم کھیلتے ہوئے براہ راست لوگوں کو دکھا کر آپ متعلقہ کمپنیز کے ساتھ تعاون سے کامیابی کے ساتھ پیسے کما سکتے ہیں۔ اس کے لئے عموماً لوگ ‘یوٹیوب’ اور ‘ٹویچ’ پر ہزاروں، لاکھوں افراد کو براہ راست میچز دکھا کر شہرت اور پیسہ سمیٹتے ہیں جیسے یہ سکاٹش دادی امّاں کما رہی ہیں۔

آخری دو بول

گیم کھیلئے اور دوسروں کو بھی سکھائیں۔ ساتھ میں جسمانی ورزش بھی کریں اور آنکھوں کا خیال بھی رکھیں۔ کیونکہ صحت ہے تو مزہ ہے ورنہ سب بے کار ہے۔

کھیل ہے مضبوط اعصاب کا

جیتے گا وہ جس میں ہو گا دم

یہ جیت کی نہیں بقاء کی جنگ ہے

جانئے آن لائن کھیلوں کی دنیا میں تہلکہ مچانے والی گیم  فورٹ نائیٹ کی داستان 

گیم کا آغاز کیسے ہوتا ہے؟

سو سے زائد لوگ ایک جزیرے پر  صرف ایک کدال کے ساتھ ایک اڑنے والی بیٹل بس میں پہنچتے ہیں، کھلاڑی پیراشوٹ کے ذریعے جب چاہیں، جہاں چاہیں جزیرے پر اتر تے ہیں۔ اترتے ہی اُن کا کام اپنے دفاع اور دشمن پر حملہ کرنے کے لئے اسلحہ، زرہ بکتر اور زخموں کے لئے ادویات اکٹھا کرنا ہوتا ہے۔

یہ کھلاڑی 4،4 لوگوں کے گروہ بنا سکتے ہیں۔ پھر ان کا کام تعمیراتی سامان جیسے لکڑی، دھات اور پتھر وغیرہ اکٹھا کرکے اپنے لئے پناہ گاہیں بنانا ہوتا ہے۔

اس کے علاوہ اسلحے کو چلانا، اس میں مہارت حاصل کرنا بھی ضروری ہے۔ گیم کے آغاز کے تھوڑی دیر بعد ہی جزیرے پر ایک طوفان آ جاتا ہے جس سے جزیرہ مختصر ہوتا چلا جاتا ہے اور سب کھلاڑیوں کو ایک دوسرے کے نزدیک ہونا پڑتا ہے۔  جس سے اُن کا ایک دوسرے سے سامنا بھی نا گزیر ہے۔ یہ سامنا اس لئے لازمی ہے کیونکہ جزیرے کے ‘محفوظ مقام’ سے باہر طوفان میں رہنے کی صورت میں کھلاڑی وقت کے ساتھ ‘بیمار’ ہو سکتے ہیں اور انہیں جسمانی نقصان اٹھانا پڑ سکتا ہے۔ جیسے جیسے جگہ تنگ ہوتی جاتی ہے ویسے ویسے کھلاڑیوں کے درمیان مقابلہ سخت ہوتا جاتا ہے اور جیت صرف اُس کی ہوتی ہے جو آخر میں باقی زندہ بچے۔

گیم کس نے اور کب بنائی؟ عوام میں اس کی مقبولیت کتنی ہے؟

یہ گیم اگست2017 میں ایک امریکی کمپنی ‘ایپک گیمز’ کے پلیٹ فارم سے سالوں کی محنت کے بعد ریلیز کی گئی۔ ایک مہینے کے اندر 10 لاکھ لوگ اس گیم کے رجسٹرڈ پلیئرز بن گئےاور 2017 کے اخیر تک یہ تعداد 3 کروڑ تک پہنچ گئی۔

رواں سال 2024ء میں 65 کروڑ لوگ اس گیم کے رجسٹرڈ پلیئرز ہیں اور روزانہ 11 لاکھ پلیئرز اسے کھیلتے ہیں۔ کمائی کے طور پر یہ گیم اب تک 26 ارب ڈالرز حاصل کر چکی ہے۔جو پاکستانی روپے کی مد میں 72 کھرب، 38 ارب،68 کروڑ،82 لاکھ 36 ہزار بنتے ہیں۔

صرف سال 2022ء میں 6  ارب ڈالرز کی کمائی ہوئی ہے ۔ یہ گیم جوانوں اور بوڑھوں میں یکساں مقبول ہے۔ اس کی ایک بڑی وجہ یہ ہے کہ اس میں آپ کو تشدد اور مار کٹائی کے مناظر بہت زیادہ نظر نہیں آتے جیسے خون کا گرنا وغیرہ۔

اس گیم کو کون کھیل سکتا ہے؟

      اس کھیل کو ایک کھلاڑی کھیل سکتا ہے۔

      دو کھیل سکتے ہیں۔

      تین اور چار کی ٹیم کھیل  سکتی ہے۔

گیم کھیلنے کی کیا قیمت ادا کرنی پڑتی ہے؟

یہ گیم آپ ایپک گیمز کے پیج سے مفت ڈاؤن لوڈ کر سکتے ہیں۔اس کے علاوہ پلے اسٹیشن سٹور، ایکس بوکس لائیو اور ایپ سٹور سے بھی حاصل کی جا سکتی ہے۔ ‘ایپک گیمز’ کے پیج پر اکاؤنٹ بنا کر گیم کھیلنا شروع کر دیں۔ ہاں آپ کو گیم کھیلنے کے لئے اور بہتر تجربہ حاصل کرنے کے لئے کچھ چیزیں خریدنی پڑتی ہیں جیسے ‘اسکن’، ایموٹس اور ‘ بیٹل پاس’ وغیرہ۔

      اسکن : کھلاڑی یا پلیئر کا حلیہ جو اسکن کو ایپ سٹور سے خرید کر تبدیل کیا جا سکتا ہے۔

·      ای موٹس: گیمز کی زبان میں اس کا مطلب ہے وہ طریقے جو پلیئرز ایک دوسرے سے بات چیت کرنے کے لئے اختیار کرتے ہیں اور جن سے وہ اپنے جذبات اور ارادوں کا اظہار کرتے ہیں۔ ٹیم کی حیثیت میں کھیلنے کی صورت میں ای موٹس خریدنا بہت ضروری ہو جاتا ہے۔

      بیٹل پاس: یہ پاس کھیل کے تجربے کو بہتر بناتا ہے اور لیول کو مکمل کرنے کی صورت میں کھلاڑی کو’اچھا صلہ’ ملتا ہے اور آگے بڑھنے میں آسانی ہوتی ہے۔

فورٹ نائیٹ بیٹل روئیل کو جیتنے کے 10 کامیاب ٹوٹکے

گیم کو کامیابی کے ساتھ کھیلنے اور اس کا بھر پور لطف اٹھانے کے لیے ضروری ہے کہ آپ مکمل تیاری کے ساتھ میدان میں اتریں۔ اس تیاری میں اگر آپ ان باتوں کا خیال رکھیں گے تو لازمی کامیاب ہوں گے۔

اُترنے کے لئے بہترین جگہ کا انتخاب

بیٹل بس سے جزیرے پر اترنے کے لئے ہمیشہ ایسی جگہ کا انتخاب کریں جہاں وافر مقدار میں سازوسامان پڑا ہو۔ یقیناً یہاں اور کھلاڑی بھی ہوں گے جن سے سامنا ہو سکتا ہےاور لڑنا پڑ سکتا ہے لیکن کسی سنسان جگہ پر اترنے سے گیم کی سُست رفتار ہو جائے گی۔

جنگی سامان ہر طرح کا ہو

• مقابلے کے لئے شوٹ گن قریب کا سامنا ہونے کی صورت میں پاس ہونا  چاہیئے۔
• رائفل، مڈ رینج کی لڑائی میں کام آئے گا۔
• سنائپر رائفل دور کھڑے دشمن کو نشانہ بنانے کے لئے مؤثر ہے۔
• اور اپنے بچاؤ کے لئے آپ کے پاس ایک مناسب مقدار میں ادویات اور ڈھال کا ہونا بھی ضروری ہے۔

پناہ گاہ ہمیشہ اونچی جگہ پر تعمیر کریں

اس گیم کی ایک نمایاں خصوصیت اس کا ‘بلڈنگ پارٹ’ ہے۔ یعنی آپ اپنی مرضی سے اپنے بچاؤ کے لئے اپنی کدال سے مٹی، دھات اور دیگر سامان کھود کر یا ڈھونڈ کر ایک مضبوط ڈھال تعمیر کر سکتے ہیں۔ اس کے لئے ضروری ہے کہ آپ ایک اونچی جگہ منتخب کریں تاکہ زیادہ سے زیادہ دشمنوں پر نظر رکھ سکیں۔

متحرک رہیں

زیادہ سے زیادہ موو کریں، اگر آپ ایک ہی جگہ پر کھڑے رہے تو جلد دشمن کی نظر میں آ جائیں گے اور اُن کا نشانہ بن جائیں گے۔

طوفان کو اپنے فائدے کے لئے استعمال کریں

جزیرے کے کنارے پر جہاں طوفان آرہا ہے، وہاں سے بچنے کی کوشش ہر کھلاڑی کرتا ہے لیکن آپ طوفان کا وقت اور شدت ‘نوٹ’ کر لیں اور کنارے پر رہ کر دشمن کا ‘یکدم’ سامنا کر کے اسے ہرا دیں۔

لڑائی سوچ سمجھ کر منتخب کریں

ہر لڑائی میں کود پڑنا آپ کو تھکا سکتا ہے اور زخمی ہونے کا امکان بھی ہے۔ اس لئے ہمیشہ سوچ سمجھ کر اور نتائج کا اندازہ کر کے جیتنے کے امکان کو مدنظر رکھ کر مقابلہ کریں۔ کبھی کبھار لڑائی سے بچنا بھی ایک کامیاب حکمتِ عملی ثابت ہو سکتی ہے۔

کھیلی ہوئی ہر گیم کو دوبارہ دیکھیں

اپنی کھیلی ہوئی گیم کو ریوائنڈ کرنے سے آپ اپنی غلطیوں کا اندازہ کر سکتے ہیں اور اپنی حکمتِ عملی کو بہتر بنا سکتے ہیں۔

دوستوں کے ساتھ کھیلیں

سنگل کھیلنے کےعلاوہ آپ ٹیم کے ساتھ بھی ضرور کھیلیں۔ اس طرح ایک دوسرے کو ‘کور’ کرنا، مقابلے کے وقت ڈھال بننا اور زخمی ہونے کی صورت میں مدد کا ملنا آسان ہو جاتاہے۔

دوسروں کو کھیلتا ہوا دیکھیں

گیم کے مشہور اور کامیاب کھلاڑیوں کی لائیو سٹریمنگ اور سابقہ میچز کو غور سے دیکھیں اور جنگی حکمتِ عملی سیکھیں۔

اپ ٹو ڈیٹ رہیں

یہ ایک ایسی گیم ہے جو مسلسل اپ ڈیٹ ہوتی رہتی ہے۔ میکرز نت نئی ‘اسکن’، ہتھیار اور نقشے متعارف کرواتے رہتے ہیں۔ان کو ساتھ ساتھ استعمال کرنے سے آپ بہتر گیم کھیل سکتے ہیں۔

یہ وہ چند تجاویز ہیں جن کو کام میں لا کر آپ نہ صرف اس گیم کے ماہر بن سکتے ہیں بلکہ لائیو سٹریمنگ کر کے لاکھوں کما بھی سکتے ہیں۔

گیم سے کیا سیکھا جا سکتا ہے؟

یہ ایسا دماغ اُڑا دینے والا تجربہ ہے کہ کھیلنے والے گھنٹوں اس میں مگن رہتے ہیں اور وقت گزرنے کا احساس تک نہیں ہوتا۔ اس ملٹی پلیئرز گیم سے آپ بہت کچھ سیکھ سکتے ہیں جیسے کہ

•       جلد اور درست فیصلہ کرنے کی صلاحیت پیدا کر سکتے ہیں۔
•       باہمی تعاون کا سلیقہ سیکھ سکتے ہیں۔
•       دماغی قوت کو طاقتور بنا سکتے ہیں۔
•       مقابلہ کرنے کا اعتماد پیدا ہو سکتا ہے۔